Sujet 2017: Unterem Schwarz isch villes bunt, drumm zäige mir öis jetzt unvermummt

Halbmondclique Frenkendorf

Unterem Schwarz isch villes bunt, drumm zäige mir öis jetzt unvermummt

Unterem Gwand drybts mänge bunt

drumm zeigt sich d Schwiz jetzt unvermummt

sygs Bankräuber - sygs Demonstrant

ob Teebeutel oder Hydrant

Burka, Niqap, Kebap, Hidschap!

Gsundheit - Dangschön! Killerclöön

Hooligans und Terrorischte

d Schwiz duet Grümelchammere mischte

Fraue, Männer, Huusdier, Chinder

Lümpe abe - zeiged Grinder!

me will i der Schwiz wenns irgend got

e absoluts Verhüllverbot!

Do drüber dien si debatiere

Links und Rächts sich sabotiere

im Färnseh gsesch Politiker

mit Plauderi und Kritiker

villne Bürger wirds angscht und bang

si finde sone Duech e Zwang

klar macht das Verbot e Sinn

bi Hooligans im Joggeli din

und bi Demonstrante au

sicher au an mänger Frau

die meischte si jo drunder schön

und s macht au Sinn für Killerclön

Mir läbe zmitz im EU-Rych

sy nit derby und trotzdäm glych

het d EU au mit eus e Qual

Mir si halt Schwizer und neutral!

Hei Schoggi, Ches und Fondue gärn

hei s Frauestimmrächt - mir si modärn!

Nur eis das duet im Schwizer wee,

är möcht d Frau ohni Burka gseh,

drumm stryte SP und au SVP

si ei de Moselm s Duech wäg nee

ähnlig wie e Autiebahnvignette

wo jede mues an d Schibe glette

wo vo dusse schnäll mit sym Chare

dur d Schwiz will dure fahre

und isch är mit sym Chaare wider duss

gilt denn d Vignette nümm zum Schluss

ebe so ähnlig aber andersch umme

heissts anstatt Vignette - kei vermumme!

s wird Niqab, Burka oder birkini

ersetzt denn durch e Bikini

so chasch in sym neue BMW

der Ali dur d Schwiz kurve gseh

si Frau lächlet findets toll

lot d Hülle falle am Dütsche Zoll

är chauft e Vignette und blybt still

will är eigentlich nach Italie will

Es dänkt sich d Moslem Frau im stumme

was sölls, i due mi däne neu vermumme.

so fahre si mit Vignette und ohni Burka

schnäll durd Schwiz übere Furka

isch är den in Italia

leit si das Duech halt wieder a

und am Stürrad näbedra

chrazt der Ali ihre Maa

d Vignette wieder vo der Schiebe

si fahre witer - si wei nit blybe.

Mir si modärn nit öppe stur

dulde Religion wi au Kultur

doch gseht e menge Schwizer Bürger

im Schwarze Duech e Freiheitswürger

und näbeby halt ebe au

e Misshandlig an der Frau

Burka gseht dr Schwizer als Schlinge

d Frau darf do jo scho go stimme

Wenn au erscht sit vier joorzähnt

Mir si modärn - sig do erwähnt

mir si neutral im grosse ganze

drumm gits bi eus kei Duech am Ranze!

Und wäm das halt nit passt zum schluss

Dä cha nit yne - dä blybt duss.

unterm Schwarz isch villes bunt

drumm zeigt sich d Schwiz jetzt unvermummt!

S isch halt eso - mir gsehn das y

doch wie söll das an der Fasnacht sy?

Klar Goschtüm sy jo kei Problem

au Perügge nit, wie mir das gsehn

doch um d Larve chunsch nit umme

die ghört doch denn au zum Vermumme

Wär das nit e grosse Shit

wenns an der Fasnacht - chäms sowyt -

S"Gäll du kennsch mit nit" nit git?

Fasnächtlich gseh isch das nit gsund,

die Politiker hei sis Hirn vermummt,

si hän sich um die ganz Hirnrinde

E Burkaduech lo ume binde

nit ganz verstoht sich, sisch kei Witz

An der Stirne vorne gits e Schlitz

Dört luege - sisch zum in d Hose seiche

anstatt zwei Auge - Dollerzeiche.

So änderet sich d Sicht ganz gschwind

wär het jetzt e Brätt am Grind?

Het nit e mänge modärne Mensch

e Maske a, das en nit kennsch?

Und e fremdi vermummti Gschtalt

e warms Lächle drunter wo eim gfallt?

Unterem Schwarz isch villes bunt

Drum zeige mir eus jetzt unvermummt!

Zeige fründlich Emotione

Wo unter eusne Schleier wohne,

zien d Larve ab zum d Gsichter z gseh

Dien fründlich zämme eine neh

Alli Mensch si ei Gmisch

Au wenn in Füllinsdorf gebore bisch!