Sujet 2016: Mir mähää für d SBB

Halbmondclique Frenkendorf

Mir mähää für d SBB

Uf der Weid do stoht e Schoof

cheut und malmt und luegt ganz doof

plötzlig fahrt e Zug vorbyy

S Schoff luegt em noch und frisst derby

während d Reeder lut quitsche macht äs in rue

sy Chiifer kreisend uf und zue.

Schlussändlich isch der Zug denn wäg

im Schoof si Grind wieder im Dräck.

Es nimmt e Buschle Gras in d Schnure,

der negschti Zug fahrt au scho duure

und so goot das der ganz Daag lang,

duss fahrt der Zug, s Schoof frisst am Hang

sorglos malmend doof si Gras,

d SBB git derzue dusse Gas!

Und s Schööfli dänkt sich derby

das die duss Schoofseggle mien sy.

Das Schööfli het derby nit gsee

by ihm stönde no drissg Schoof me,

wo alli an däm Hügel bisse

und d Wiese dünge denn bim schisse,

doch domit isch es nit ellei

frogsch die andere Schoof, säge die "Nei.

mir wüsse nit worum mir Hase

uf dere Wiese obe grase?

Au keis vo eus do richtig weiss,

was e Zug isch und e Gleis

und zum Schluss no, waseliwas

unterscheidet e Schoof vomene Haas?"

an däm Bispyl merksch jetz au gly

das alli Schoof, Schoofseggle sy.

drumm luege mir an dere Stell

was die Aktion do wirklich sell

und das sich d Antwort druff duet lohne,

luege mir vo obe mit ere Drohne

das Schauspiel a uf dere Ärde

wo Schööfli näbe Züg in Härde

fridlich doof uf Wiese graase

wo d SBB duet dureraase.

In der ganz Nordwestschwiz chasches gsee

s het nit ei Hang, s het no vill mee.

dutzendi vo Härde frässe

s grüeni Gras ganz sälbschtvergässe

si bearbeite jede Hang

die ganzi Bahnlinie entlang.

der Initiant, frogsch di derby

mues allwäg au e Schoofseggel sy.

d Antwort wei mir Euch jetzt gee

die mähaa dört für d SBB!

Uf 2700 Hektare

frässe si in Schaare

entspricht ere Grössi, jetzt muesch lose

vo 3800 Fuessballfälder grosse,

mit 55000 Schoof multipliziert

nach obe frei, keis isch kaschtriert.

Macht summa summarum in Franke:

e halbi Milliarde, d Stüürzahler danke!

Wär das zahlt gseht do der Bürger y,

muess scho au e Schoofseggel sy.

Mir beruhige do an dere Stell,

das der Bürger sich nit sorge sell,

isch die Zahl au noch so gross

die Schöfli schaffe choschtelos.

Für si isch frässe au gar nit schaffe,

au nit der Zug wo durrefahrt azgaffe,

die wüsse nämmlig gar nit

was e Zug isch und worums dä git.

Au Tierhaltig isch optimal

die grase friedlich ohni Qual,

s einizi Problem wo die Tierli muggt,

wir hinde wieder usedruggt.

Und d Wüsseschaft meint über d Schoof:

die Tierli sy au eher doof,

e Schoof het, hei si usegfunde,

e Erinnerigsvermöge vo zwanzig Sekunde.

Dreit sich e Schoof zweimoll im Kreis

sy Usgangspunkt äs nümme weiss.

Es frisst sy Gras und dänkt derby:

do bini jo no gar nie gsi

und au s Gras isch do ganz früsch

und i weiss gar nit was das dört ähne isch

und findet der Zug am Horizont toll

S gseht en jo zum erschte Moll.

nd an d Fahrgescht no vo der SBB

wo dusse d Schööfli chöne gsee:

s ygspart Gäld, i weiss s dönt hart,

wierd trotzdäm brucht, nit öppe gspart,

für s vierte Gleis zur algemeine Stroof,

will d Lieschtler sy zum plane z doof,

wird dört der Bahnhof korrigiert

für e halbi Milliarde alles saniert!

Do frogsch di, luegsch zur Schiebe us:

sitze d Schoof im Zug oder voruss?

Dank Wulle friert s Schoof nit an Ranze

und meint chauend zu däm Ganze:

"I weiss gar nit was e Schoofseggel isch

Hauptsach s Gras isch immer früsch!"

Im Fahrgascht no e guete Root

Schloof nit y, wenns irgend got

Zell d Schöfli nit wo dure sause

Süsch landisch anstatt z Lieschtel z Lause.