Sujet 2011: Mir tschille vor dr Chille

Halbmondclique Frenkendorf

Mir tschille vor dr Chille

Hütt woni ufgwacht bi, grad nach em penne,

ha ni eine gseh durs Dorf dure renne.

Er isch g’sprunge bim Schuelhuus umme Egge,

und duet grad no uf sym Natel tschegge.

Öb ächt dr Buss wo im Dorf vorne duet halte,

nachem neue Fahrplan duet fahre, oder nach em alte!

Denn pünktlich muess dä am Morge goh schaffe,

und merkt nit das ich em hinde noh due gaffe!

Alli heis eilig es isch efang verruckt,

und wenn ich drüber noh dänk, macht’s mi ganz bedruckt.

Früener hesch für alles meh Zyt gha im Läbe,

und hütt springe alli ummenand das finde mir total dr’näbe.

Jede will alles und möchte überall sy,

drumm hett er kei Zyt me und secklet am Läbe verby.

D’Lüt hocke im Chare und wärde verruckt,

wenn dä vorne dra nid ufe Gashebel druckt.

Dr Sutter stoht im Dorf und luegt dere Sach gelasse zue,

Mit dämm het er sich abgfunde, das bringt ihn nümm us dr Rueh!

Jede wo ihn gseht, do isch er sicher, fahrt langsam duure,

schünscht haltet er ihn ah und duet mit ihm schnure.

Früenner, hesch im Dorf über d’Stroos no chönne laufe,

wenn in d’Metzg oder zum Beck öppis hesch welle go chaufe.

D’Chinder hei gspillt im Brunne oder uf dr Stroos,

wär das hütte no so, das wäri famos!

Hütt hocke sy vor em Lädeli im Dorf und düend vo dr Büggse schlucke,

während dämm sich d’Auto mit 30 im Stau dur’d Hauptstross duure drucke.

Es isch nümm eifach, denn alli si gstresst und das isch intressannt,

wäge dämm hett keine meh Zyt und alli heis pressant.

S’git Lüt die si scho Chrank wäge däm Verhalte,

und närve sich dr ganz Daag ab de Junge und de Alte.

Doch jetzt chunnt die Zyt wome über alles cha lache,

und sich Gedanke und Sprüchli über die G’stresste duet mache.

Die Sprüchli möche si bispilswys bim Tschill am Rhy,

und bi eus z’Fränkedorf bisch vor dr Chille dr’by.

Gang gmüetlich, wei mir an dere Fasnacht brilliere

und zoobe dur Gasse und um d’Chille flaniere.

Als Waggis ganz cool wei mir das Joohr uf d’Stross,

Die ganzi Clique, vo de Chlinschte bis ganz Gross.

Dr Ängel Franky duet eus an dr Fasnacht regiere,

und mit sim Majorstock eusi Märsch dirigiere.

Slow Down Take it Easy,

so wei mir an dere Fasnacht dr’by si.

Mach langsam, nimms liecht, das isch euse Wille,

drum hei mir als Motto das Joohr: mir Tschille vor dr Chille.