Drum schläcke mir d Ragette Glace und gniesse, Dass sich vor 50 Johr ä Mensch ufe Mond het lo schiesse.
|
Halbmondclique Frenkendorf
Drum schläcke mir d Ragette Glace und gniesse, dass sich vor 50 Johr ä Mensch ufe Mond het lo schiesse |
|
700`000 v.Chr. heters gmacht,
dr Homo Erektus het s Füür entfacht.
Ändlich het mä sich chönne wärme und het Liecht gha in dr Nacht,
und so het d Menschheit dr erschti Fortschritt gmacht.
So hetme denn au usegfunde,
dass rohs Fleisch, grilliert denn besser duet munde.
Drum häi hald scho d Neandertaler chönne brilliere,
wenn si ihrem Schätzli s Mammut hei chönne grilliere.
Mit däm Füür het au dr Ehrgiz afo brenne,
und so isches los gange mit däm ewige Wettrenne.
Scho denn hets gheisse: höcher , wyter , schnäller, aber geh hets do no keini Propäller.
Drum hetme öbbis anders müesse erfinde, Zum s Lauftempo z überwinde.
Ohni Egge hets müesse sii, dasses ins rolle chunnt,
drum hetme sich dänkt, wiso nid rund?
D Lösig die isch 3500v.Chr. schnäll barat,
und so hetme erfunde: s runde Rad.
1712 het denn ä schlaue Maa s Füür und s Rad vrbunde,
und drzue no mit Wasser die geniali Dampfmaschine erfunde.
Dampf chasch ebbe nid nur bruuche zum choche,
Und so het sich für d Menschheit ufdo, ä neui Epoche.
Lang ischs denn nümm gange zunere schnällere Alternative,
scho glii ischsi uf dä Schiine gsie: die erschti Dampflokomotive.
Höcher, wyter, schnäller gohts vora, d Menschheit blibt mit grossem Tempo dra.
D Wält drüllt immer schnäller, dr Wettkampf isch lanciert, Wär weiss, was do no alles passiert.
Immer meh gits vo dene Erfinder,
nid nur d Russe und d Amis, sondern au d Inder.
Die häi nämmli öbbis bsunders erfunde:
s Yoga - dä Trend wo hütte d Wält duet umrunde.
S erschte Auto het erfunde dr Carli Benz,
aber au imene andere chöpfli brennts.
Dr Henry Ford, dä schlaui Maa
Tribt d masseproduktion vom Auto vorah.
Dr Mensch het sich immer witer und schnäller vo dähäi welle entfärne,
sogar ind Luft häi si welle und griffe noch dä Stärne.
„Mir wäi die erschte in dr Luft sii“, häi si gsäit.
1903 - d Gebrüeder Wright.
Immer Höcher, wyter, schnäller
Und jetzt ändlich au mit Propäller.
Die erschtä Flugzüg hebe ab,
ufem Bode fortbewege hetme satt.
Mä will dr Himmel erkunde
Und dr Mond und d Stärne vrsueche z umrunde.
Jetzt wäi si d Wält gseh, vo Obe,
nid nur d Amis oder d Russe, näi au d Schwobe.
Drum häi jetzt d Flugzüg nümme glängt
Und so häi si die erschti Ragette in Himmel ufe gsprängt.
Bis hüt wäisme noni ganz genau,
Wär dr erscht gsi isch im Ragette Bau.
Öb d Amis, d Russe oder d Chinese,
do gits ganz vrschiideni These.
Äis isch klar, dr erscht Maa im All,
isch dr Juri Gagarin gsi, ä Russ, im Fall.
Do d Amis jetzt dr erschti Rückschlag häi kassiert,
isch ändgültig dr Wettkampf um dr erschti Ma aufm Mond lanciert.
|
|
Am höchschtä, wytischtä und schnällschtä si am Schluss,
d Amis gsi - und nid dr Russ.
Am 21. Juli 1969 nochme Hölleritt,
Macht dr Neil Armstrong ufm Mond dr erschti Schritt.
„Das isch ä chliine Schritt für ä Mensch, aber ä riisige Sprung für d Menschheit“ heter gsäit,
und das ganze hetme live im Färnseh überträit.
Au in dr Schwiz sisi ufgstande, zmitz in dr Nacht,
und häi die Mondlandig vrfolgt, in voller Pracht.
Zum das grosse Eregniss würdig z zelebriere,
Hetme bi eus im Land öbbis afo kreiere.
Höcher, wyter, schnäller,
denn gang an Tiefchüehler abe in Chäller.
Dört findsch die bsunderi Kreation,
Wo hüt no gfallt dr ganze Nation.
Orange, wiss und obe, sisch käi Witz,
Hets ä feine bruune Schoggi-Spitz.
Jetzt wäiss glaub jede vo was mir brichte,
ä Abchüelig wo mir nüm druf wette vrzichte.
Mit dr Überhitzig isches jetzt vrbii,
ä Erfindig vodr Frisco isches gsi.
Au hüt no, 5 Johrzähnt noch däm Tumult,
isch die Glace eifach kult.
Drum schläcke mir d Ragette Glace und gniesse,
Dass sich vor 50 Johr ä Mensch ufe Mond het lo schiesse.
|
|
|
|||||||||
Das isch dr Sujet 2019 Bricht - Do goht's zrugg zur Übersicht