Halbmondclique Frenkendorf 

E jedi Mode macht me hütt bekanntlig mit,

au wenn s verschütt!

Das foot scho aa, bi euser Sprooch

me schuurrt de Yankee alles nooch:

S isch nüt dr Plausch mee, s isch e Hit!

Es git kei Mischt mee, numme Shit!

Me leggt sich aa mit Short und Shirt

het uf dr Biire, will sich s ghöört

e vercheerti Baseball-Chappe an de Flosse

Jogger-Schlappe und alles guet zwei Nummere z gross

so göön hütt d Goofe do uff d Strooss!

Däm Amy-Outfit nooch, vo dääne,

hesch s Gfüül, de sygsch in Harlem ääne!

Drum seit men au (s döönt wie ne Witz)

de Chind nümm Chinder, hütt syy s Kids!

Statt Ankeschnitte vo dehei Schlucke sy Big Macs,

und syy high!

Und will die Big Macs üppig syy

schütte sy Coke light hindedryy

und griege denne, z mitts im Lärm

vo heavy music, blaui Därm!

Und s Dickschte isch: Kein merkt was lauft!

Was Trend und Higlight isch, wird kauft

denn wär nit mitmacht, isch nit in

nd het bi syny Friends ein drinn!

Wie Marionetten an de Fääde

stolperet d Jugend hütt dur d Lääde!

Sy taucht in Fashion-Saloons under

nd chauft in Shops und Stores dä Plunder

wo iine d Wärbig lang und breit

in s Hirni drummlet Day and Night.

Drum triffsch denn z Ooben in de Pubs bim Red Bull-Schlürfe in de Clubs

im Yankee-Look,

nach US-Norm

e Heer vo Teens in Uniform.

Im Glychschritt goot me hütt als Team

dä Wärbefritzen uff e Lyym!

Mee liist dr „Blick“, will dä tuet motze

und isch dä glääse, tuet me glotze!

Und dört, wie chönnts au anderscht syy

vor allem d Clips im MTV!

Will anderscht as bi News, bi Clips,

me au cha glotze, ooni Gribs!

Und will bi Clips all’s blitzschnäll gott

hets zwüsche duure Platz für d Spot

und dört wird eim uff english gseit

was me hütt frisst und was me treit!

E Film chasch hütte nümme luege

denn d Wärbig rysst en us de Fuege!

Drumm luegsch statt em „Indiana Jones“

„Feuerstein“ alias „Flintstones“.

Dasch neume dure wunderbar

denn d „Flitstones“ zeige klipp und klar

wo mir glägentlich tien lande

und mit euser Dänkart strande

„Back to the past“, uff Mundart gseit:

D Steizyyt wird bald Wirklichkeit!