Sujet 2002: Legal? Illegal? Egal?
|
Halbmondclique Frenkendorf
Legal? Illegal? Egal?
Was isch scho ne Sucht und was isch es nonig? Was sött me stoofe? – Für was gits Beloonig? Also ich kenn do eine, dä qualmt wie ne Schloot! Am liebschten us sämtlige Löcher, wo s goot! Är steckt syny Frösch ins Muul, d Oore, d Naase und ziet sen yyne total in Ekstaase! Z Ooben im Näscht denn, chyycht er beläpperet will d Lunge gyyrt und d Bronchie chläpperet! Doch chuum öbber gits, wo das nöcher beriert denn s ghört zum Alldaag, drum wird’s akzeptiert! S einzig, wo die Glimmstängel-Paffer tien reize sin d Auge vo de Nichtraucher in de Beize! S Sygaretterauche isch e Ritual und drum au normal und völlig legal!
Und wemmers grad hei, vo Pinte und Knille: Mängg Eine tuet mee ass dr eige Durscht stille! Und yy reed nit emol vo Deene, wo zittere wenn sy am Morge frie s erscht Bierli tien wittere! Es git nämmlig gnue, die tien erscht wemme s Füüroobe-Glöggli ghört, d Hümpe stemme! Oobe für Oobe beglücke sy d Wampe mit Bier, Wyy und Schnaps und fülle d Lampe! Und spoot in dr Nacht, waggle sy hei mit eme Tirgel im Gsicht und mit Schlick in de Bei! S git punkto Löögele aber au die wo im stille chämmerli an dr Fläsche tien zie! Das heisst: au s Sürpfle isch e Ritual und drum normal und völlig legal!
Und wemmer grad d Sücht bim Name tien nenne s git au deere, die tuet me gar nit erkenne: Wenn öbber vom Morge bis z Oobe spoot dehei sy Färnseher laufe loot und sogar bim e Bsuech, nit uff s Chnöpfli druckt oder wenn s Bild tuet flimmere, wie verruckt denn würd doch kein säge, dä tuet übertryybe und behaupte, so ein heig e matty Schyybe! Derby isch doch öbber, wo numme tuet glotze und derby no ständig über s Programm tut motze alles andere als e chärngsunde Schlemmer sondern e Suchthuffe, gnau wie d Süffel und d Flemmer! Aber ebe, au s Glotze isch e Ritual und drum normal und völlig legal!
Oder wie isch es mit Deene, wo praktisch nüt me reede mit Fründ oder andere Lüüt wo überall, wo sy anechömme numme no biireweich anepflömme und s Natel zücke und ooni z faggle SMS schicke bis d Oore gwaggle: „Hallo ich bin da, bisch du öbben dört oder bist du schon hier und ich habs nicht gehört? „In einer Minute isch es viertel vor vier nochzwei Minuten, dann bin ich bei dir! Dann lassen wir gmeinsam ein SMS usen wir seinen bis viertel ab vier am schmusen!“ Stumpfsinnig töggele sy Blödsinn in d Wält und spaaren am Ässe, denn dä Bullshit choscht Gäld! D Konversation blybt dur das zimmlig infantil aber d hauptsach isch, men isch mobil! Au s Essemmessle isch e Ritual und drum normal und völlig legal!
Nach deene Byspyyl liggt klar uff dr Hand d Meinig, was e Sucht isch, goot wyt usenand! D Trinker und d Raucher: die hei e Lobby wo tuet als weere die Laschter nur Hobby! Denn gits die Einte, die finde s gieng z wyyt wenn me vorschrifte miech in euserer Zyt! Die anderi Syytte, die ziet in Betracht das men alls sött verbiete, was abhängig macht! Nummen ebe, do chunnt me denn, wies eus dunkt scho gly emoll an e ganz heikle Punkt: Abhängig sy mer nämmlig vo ganz vill Sache won ys friener oder spöter chrank tien mache! Ych kenn Lüüt, die sin süchtig nach Praliné derby tien die Härzverfettig gee! Anderi verschlinge Chueche in Mänge dr Cholesterinspiegel tien sy eifach verdränge! Dritti die suffe muchlewyys Kaffi und wenn s Härz denn nümm will, mache sy Gsichter, baffi! D Auti und Heizige puffe Dräck in d Luft wär s usbringt isch nüt as e griene Schuft! Denn alli die Byspyyl sy Ritual und lengscht ganz normal und völlig legal!
Drum isch au logisch, ass s berüchtigschte Chrüttli nöggschtens freigee wird, für die süchtigschte Lüttli! Denn chasch ooni Stroof in verrauchte Beize au mit siesse Düft d Nichtraucher-Auge reize! Und wenn s die denn lüpft und sy gönge hei spillt das kei Rugel, denn du bisch jo high und füülsch dy wool im Rusch vom Hampf! Vergissisch im Dampf dr täglig Chrampf! Und plötzlig findsch alles kolossal und im wyteschte Sinn spiritual und vor allem roserot emotional! Was dusse passiert isch dr dennen egal! Und Alli, wo nit kiffe sy abnormal! Und überhaupt isch s Läbe schyssegal! Und drum frog my, was söll die Foog di banal vo illegal, egalo oder legal?
S Einzig wo deer Froog no ne Sinn tuet gee isch wemme se an dr Fansnacht als Süschee tuet nee! |
|
Das isch dr Sujet 2002 Bricht - Do goht's zrugg zur Übersicht |