Sujet 2003: Au mir mache mit bim Swisslogo-Hit

Halbmondclique Frenkendorf

 

 

Au  mir mache mit bim Swisslogo-Hit

 

All’s was läbt, öb Mensch, öb Tier

markiert bekanntlig sy Revier.

D Chatz zum Byspyyl, macht e Tänzli

und zitteret mit ihrem Schwänzli!

Scho schmeggt dr Garte, s Huus, dr Platz

penetrant nach deere Chatz!

Gnau so machts au s Nochbers Hundi

das dräjt täglig syny Rundi

lüpft bi jedem Baum und Stei

zwäcks Markierig schnäll sy Bei

und denn weiss dr hinterscht Köter

wo verby chunnt e bitz spöter:

„Halt! Do isch scho Ein am campe!“

Und verziet sich, sünscht gits Lämpe!

 

Notürlig macht dr Mensch nit s Glyche

är tuet nit um d Hütte schlyche

und lüpft denn überall sy Bei!

(Ämel sicher nit bi sich dehei!)

Nei – är macht um s Huus e Hag

oder ämel e Verschlag

und ass es au dr Letschti schnallt

wird an s Tor e Warnschild knallt

wo s druff gross und dütlig heisst:

„Achtung Terrier, der beisst!“

Jetzt isch au im Dümmschte klar

do het Ein sy "Territoire"

 

Zwar tien au d Mensche, so wie d Tier

Duftmarke setzen im Revier:

Die Einti schmeckt nach "Chanel zwoo"

dr Ander mee nach "Brie de Meau"

Die Dritti stinkt nach "Eau de toilette"

dr vierti bös nach Daggsefett!

Dr Jokeb schmeckt nach Stall und Rind

und das fuffzg Meter geege ne Wind!

Und s Hanneluggi niechtelet

will s in dr Woonig fiechtelet!

Z mitts im Dorf inn gits e Täsche

wo ünzelet vom ville wäsche!

Und ych kenn Ein, dä het e Gschmack

als hätt er Münschterchees im Sack!

Denn isch au Stumperauch speziell

im Vorhandstoff inn originell!

Die Gyspyyl zeige: nit nur d Tier

markiere mänggmol iir Revier!

 

Doch wil dr Mensch cha rächne, läse

isch är au s Gscheitscht vo alle Wäse

und drum kennt är punkte klassiere

e wyteri Art zum sich markiere:

Und zwar gis all's mee Männli, Wybli

mit farbig buntbedruckte Lybli

wo in Bild und Schrift eim gschickt

klar tien mache, wie Ein tickt

 

Treit zum Byspyyl voller Luscht

ein dr Murat uff dr Bruscht

Denn chan e Jede sofort gsee

das isch e Fan vom FCB!

En andere zeigt via sy Shirt

ass är uff d Garasch Meier schwört

Und eine treit, är find das s Töllschte

e Lybli vom ene Night-Club z Höölschte!

Ein tuet sogar, dä isch nit bache

für d Ebner-Bank Reklame mache!

Und villi träge, zwar diskret

aber sichtbar e Signet!

E Zeiche, wo tuet klar erhelle

zu wellere Schicht ass me tuet zelle!

Zum Byspyyl trägen efang Vill

vom Lakotz do das Krokodill

denn das zeigt klar, do wird druff gschwört

ass me zu de Bessere ghört!

Anderi füüle sich ganz gross

in Pullishirts vom Hugo Boss!

Denn gits notürlig Filigrani

die träge praktisch nur Armani

und mängge chunnt sich bäumig vor

mit eme Blazer vom Dior

 

Und s Fuessvolk treit denn waseliwas?

Jä! - ABM und Adidas!

Doch dr allerneuschti Hit

wos hüt im Wärbe-Sektor git

das sin die nationale Wappe

uff Lybli, Hose, Hemmli, Chappe!

tourischten us den USA

leege Uncle-Sam-Shirts aa!

D Ängländer voller Reiseluscht

nämme dr Union Jack zur Bruscht!

Jä s git sogar Franzoose, wo

blau-wyss-rot derhär tien cho!

Gääl-root-schwarz sin d Schwoobeshirt

z Holland wird uff orange schwört

Italie stoot uff rot-wyss-grien

rot-wyss-rot treit men in Wien

 

Churz und gut, die neui Mode

sich z markiere, gwünnt an Bode!

Und wenn s letscht Land, wo an ys gränzt

au in deer neue Mode glänzt

denn goots nümm lang, bis' au bi eus

ygfiert wird als öbbis Neus!

Und drum triffsch jetz in Teneriffa

wie au z Mallorca Touris aa

die träge näbe Choffer, Täsche

und Sunneöl in Magnumfläsche

uff dr Bruscht, öb Maa, öb Frau

e Riise-Schwyzerchrütz zur Schau!

Das heisst, wenn Ein in wysse Sogge

und Strauhuet, so am Strand tuet hogge

mit dr Kamera in de Händ

isch klar, dasch Made in Switzerland!

Du muesch sogar uff de Seychelle

nümme miesam öbbis bstelle

dy Shirt macht klar: Du bisch dr Gröschti

und eins, zwei, drey bychunnsch e Röschti!

Wenn d in de Maledive bisch

denn griegsch e Fondue uff e Disch!

Und sogar in Rimini

mert me, ass mir nit Schwobe syy!

Das isch doch toll, das neu Gebaare?!

Das gfallt au eus, de Fasnachtsnaarre!

Und drum wird jetz, mir hei das bschlosse

im Schwyzerchrütz-Look d Fasnacht gnosse!

Dank däm merkt sofort Chly und Gross

do chömme Schwyzer uff dr Stross!

 

 

Das isch dr Sujet 2003 Bricht - Do goht's zrugg zur Übersicht