|
Halbmondclique Frenkendorf
Clique-Stärbe
Du luegsch uff d Uhr und glaubsch es nitt
Sy lauft dervoh die gueti Zytt
E Jede segglet, schafft und tuet,
Wo blybt mir d Zytt, seisch du vor Wuet ?
Dy Läbe machsch dir sälber schwer
Au uff dr Strooss, dä Sauverkehr
Dr Einti muess so schnäll wie möglich
Vo A nach B, s pressiert ganz tödlich
Dämm sait me Mode-Stress s’isch nit zum lache
Du findsch kei Zytt meh für die schöne Sache
Fründschaft, Gselligkeit die sinn am särble
Ehrlich, bös gsait, nei am stärbe.
Mit em grosse Strom losch du di triebe
Du hesch kei Wahl s isch nit z vermiede
Machsch alles mit, es isch der Hohn
Muesch jo nit maine es gäb Lohn
E Dorforiginal gang lauf und suech
De findsch e keins meh, s’isch e Fluech
Und d Wirgligkeit vo all däm hektisch Triebe
S Stärbe vo Original isch nit z vermiede
Ob Maa ob Frau, au jedes Kind
Nimmt us em Sagg e Händi gschwind
Was gits z Mittag, wo bisch mi Schatz?
Gäll bsetzisch mir e guete Platz
Unnötig telefoniere, schwätze, prahle
Wär dänggt scho an die böse Strahle
3 Auti stöhn vor jeder Hütte
E jedes fahrt, tuet Gift verschütte
Doch kain studiert, es losst uns kalt
Was aber liedet isch dr Wald
Mir schlittle sicher ins Verdärbe
Und d Umwält muess ganz langsam stärbe
Aldi, Lidel, Coop au Denner
Die Läde sinn dr grossi Renner
Wie Hyäne giftig und versässe
D Lädeli die wärde gfrässe
Die letschti Chance wird ne gnoh
So stärbe d Kleibetrieb dervo
„Frisch ab Hof“ kasch überall go läse
Dr Buur muess kämpfe um sy bsunder Wäse
Dr Bund, dä kürzt ihm d Subventione
Au s buure stirbt, duet nümm sich lohne
E alti Tradition, was für e Mischt
Kumm schiess es furt, keis undere Tisch
Au do fehlt doch e gsunds Interässe
Und d Tradition isch schnäll vergässe.
Vergässe isch wie nümme do
Ich sag däm stärbe und verloh.
Usdrügg, Redensarte göhn verlore
Villicht isch Dä nit do gebore
He Mann voll krass und oberschwul
Früehenglisch in der Schuel isch cool
Die Junge rede nümme dütsch
Chuderwälsch und über s Chrütz
Neui Sätz und Wort gebore wärde
Und d Muetersprooch duet langsam stärbe.
Dr Halbmond dä gseht au nitt glügglig dry
Hesch s Gfühl mit ihm siggs zimmlig bald verby
Ar wünscht sich Nochwuggs, früsches Bluet
Das gäbt für d Zuekunft wieder Muet.
Für Fründschaft, gmietlig zämme sy
Für’s Pfyffe mit em Gleesli Wy
Für’s Drummle und für d Fasnacht wänn mir wärbe
Denn eigentlig heisst s Sujet Clique-Stärbe.
|