Sujet 2008: 30er Zonä

Halbmondclique Frenkendorf

30er Zonä

Hüttzutags hei's alli pressant,

Me stresst nur no dur's ganze Land;

Me hetzt und stresst und keine verstoht,

dass d'Gmüetlichkeit drbii verlore goht.

Dr Karli hett ganz roti Ohre, i froog en und bi gschpannt;

Doch är winkt nume ab und seit - Los, i ha's pressant.

Do gseh'ni s'Miggi um en Egge flitze und frog se - he bisch zwäg?

Doch si seit numme - i ha kei Zyt, gang mer usem Wäg!

Die einte gönge in McDonalds go drive,

die andere dien s'Aesse scho tiefkiehlt hei schleiffe;

bim Aesse foht's a und goht witter bim Schaffe,

au dört muesch immer meh in chürzerer Zyt mache.

D Hektik zieht sich dr ganzi Daag duure,

Zoobe chunsch hei und bisch total uf dr Schnuure;

chuum bisch im Näscht, ghörsch wie dr Wecker schällt,

und scho hett si di wieder, die hektischi Wält.

Zömrgele im Stoh, dr Stau isch scho plant,

muesch im Gschäft merke, dä Stress isch frapant;

me zwängt sich dur d'Stroose, luegt numme gradus,

drbi isch euses Dorf doch e Augeschmuus.

Doch jetzt wird öppis an eusne Stroose gmacht,

dass bim fahre chasch gseh, das Dorf isch e Pracht.

Die Streife bim Schmitteplatz si zwar e gruus,

und bald chunnt weder Fahrer no Fuessgänger druus;

mir hound dr Hinterscht und Letscht wird die Verkehrsfiehrig tschegge.

Bim Fuessgängerstreife, mir si hütt scho so wyt,

Müesse d'Chinder luege wie d'Häftlimacher, denn d'Autofahrer hei kei Zyt;

dr Fritz sett in d'Schuel und merkt wo ner stooht,

wenn jetzt keine haltet, denn chumm i no z'spoot.

Vo chli a muesch de Chinder lehre,

passed uff und diend euch wehre;

Denn D'Autifahrer müesse dr Vortritt loh,

dass dir schön ruehig über d'Stroos chönned goh.

Doch das Problem hei mir gli unterbunde,

denn die Fuessgängerstreife si au bald verschwunde;

dr Dorfpolizischt Sutter cha d'Gmeind bald iispaare,

denn au d'Raser dörfe im Dorf numme no langsam fahre.

Das füehrt drzue dass dr Ball nid numme ufem Rase cha rolle,

nei, wie früehner chasch wieder uf dr Stroos ummetolle;

Au d'Huusfraue chönne schnädere wie früehner,

nid z'verwäggsle mit em Gegacker vo de Hüehner.

D'Manne wo in dr Beiz ein si go schnäpperle,

chöne jetzt ganz gmüetlig über d'Strosse däppele;

die Tempolimite isch nämmlig gar kei Seich,

dur d'Bewegig im Dorf blibsch fit und nid bleich.

Jetzt chönne mir s'ändlig gmüetlich neh,

und bim verbigoh enander d'Hand wieder geh;

und wenn d'langsamer dur s'Dorf chasch brause,

losch automatisch dr Stress lo sause.

Mir hoffe, dir heit jetzt gmerkt, es duet sich lohne,

bi eus im Dorf, e 30er Zone!!

Das isch dr Sujet 2008 Bricht - Do goht's zrugg zur Übersicht