|
Halbmondclique Frenkendorf
60 Johr alti Dantä d'Queen firt Jubiläum
Es isch zwar lang, isch aber wohr
mir stönde do sit sächzig Joor
jede Monet, isch s für uns Gwoned
Daag für Daag und jedi Stund
stönde mir do voruss – nur us eim Grund
obs schifft, ob d Sunne duredruckt
doch meischtens seichts und zwar verruckt
stönde mir do, stiff und ganz apart
mir Drottle vo der Royal Guard
dörfe nit schwäze- kei Bewegig mache
dien sit 60 Joor stiff do d Queen bewache
verbringe vo dene sächzig Länz im grosse Ganze
nünzig Prozänt im Räge und friere an Ranze
vor eus die graui Gass und Pfüze
zmizdrinn mir Deppe mit z grosse Müze
und im Packingham Palace hinter eus
wird d Sau abglo, es isch nüt neus
din wird danzt, din wird glache
gsoffe und no anderi Sache
gfyrt, gfeschtet und gswingt
mir passe uf das nüt nach use dringt
ei chleine Sold hei mir immerhin
An dere Stell: Gott save the Queen
Euse Job gseht lyecht us isch aber schwer
The same procedure as every Year
Doch mängmol duet e Skandal gege use dringe
denn Gheimhaltig lost sich nit erzwinge
der Secret-Service frogt eus den hindeduure
Wer isch das duss go umeschnuure
Denn blyt euse Kodex immer bym alte:
Mir gsehn und ghöre nüt und dien d Schnuure halte
Eus isch klar, es interessiert euch jetzt am Änd
Was do so abgoht hinter der Königliche Wänd
Mir brichte Euch das, der heits e so welle
Aber bitte, bitte nit wieder verzelle
Uns würdi kündet, das wär nit fair
The same procedure as every Year
Sit sächzig Joor luegt Königin Mueter
Und ihri Bruet für Prässe-Fueter
Zeige sich gege use brav und ohni Fun
Und nochhär gsesch se wieder füdleblut in der Sun
Immer s glych bi s Queens dehei
Sin alli mol Blut ob gross ob chlei
Ab und zue hän die Royals s brenne
dien den nackt dur d Stroose renne
Schimpft d Mueter denn – no dien si schwitze
Föhn e Wuche spöter wider afo flitze
D Queen hets nit lycht und närvt sich sehr
The same procedure as every Year
Chum stoht si uf zum breakfast schlüfre
Het sie dur d Sun erfahre dürfe
Der Harry geb schins wieder Gas
Stoht blut im Hotel in Vegas
„Wäri lieber ligge blybe im Bett“
Seufzt si und goht ins Internet
Dört seht sie den im Schotterock
Ihre alte geile bsoffene Bock
Unter sym Gwand hange zur Tages Feier
Sini gfaltene Spiegeleier
Si fluecht und närft sich wieder sehr
The same procedure as every Year
Au ihri Schwiegertöchter sin nüm wie friener
Zwar folge si wie bravi Hüener
Nit diskret wie d Diana ano dazumal
mit ihrem Zechelutscher im Pfärde-Stall
Nei mir rede vo der Kate
Wo hübsch isch, brav und gscheit
Wo d Queen für eimol isch sicher gsi
Die miech der Ruef nit wieders hi
E schöni Hochzyt – mit Muttis Säge
Und nach em Fescht scho wieder räge
Als heig d Queen nit scho gnue erlitte
Zeigt Kate in de Flitterwuche ihri Titte
Ufeme Ligstuel färn am Meer
The same procedure as every Year
Doch hüt isch e ganz e bsunderi Sach
Sie fiere 60 Joor Chaos unterm Puckingham-Dach
Vill Prominänz isch agreist hüt
Wills gratis öppis z suffe git
S Volk stoht geifernd duss in Schaare
Fotografiert was so duet anechare
Politiker, Filmstars, Dalai Lama
Au der Papscht chunt im Pyama
Mir lönn se ihne do die Gescht
In Palace zum Chronjubiläumsfescht
Si fyre dinne löhn sich go
Mir Drottle blybe dusse stoh
Mir sins jo gwöhnt, s isch z erdräge
S isch schön vorusse do im Räge
Mir si stolz und findes fair
The same procedure as every year
Wo d Queen im Schlofzimmer sich duet schminke
Isch der gfüllti Saal scho am Apéro drinke
Me frogt sich gegesytig mit bedänke
Was will me der Alte -wo alles het- schänke
Matriels und Gäld, jo nei
Vo Härze mues es cho, das zellt ellei
öppis mit scharm und wo originell duet schimmere
das Queen sich cha no lang erinnere
drum meint der Prinz Philipp droch und knapp
„mer zien is eifach alli ab
Uf mi zeiche: one too three
Falle d Lümpe über d Chnü!!!
Denn machi d Türe uf und rief der Mueter
Die isch das gwohnt, das Früschfleischfuetter!!“
Gesagt getan, d Queen stoht do
d Gescht hän d Chleider abeglo
alles blut sigs Ma ob Frau ob Politik, Sport, Film oder TV
Putin, Papscht und Dalai Lama
Elton John, Barack Obama
dr Maurer, Toni Blair und d Merkel
gseht füdleblut us wie e Ferkel
Der Berlusconi frolockt am andere Änd
„I fühl mi wie damals im Parlament“
Harry und Charles si Ross d Camilla
Alles nackisch in der Königs-Villa
Prinz Philipp, Willy und sy Kate
Alli d Lümpe abeheit
Alli singe si im Tackt
„Happy Birthday“ splitterfasenackt.
“I am not amused” seufzt d Queen do droche
Bym Ablick voller Hut und Chnoche
Erhebt den dapfer zum Gruess d Hand
„schön sit der cho, salli mitenand“
Und dänkt sich heimlich, läng mer s Gwehr
The same procedure as every year
Und duss stöhn mir nach sächzig Johr
S isch druurig aber woor:
immer no dervor
Während Ängland dusse d Hymne singt
luege mir das nüt dur d Muure dringt.
Stöön vorem Palascht und dien bewache:
D Royalfamily mit ihrem Drache
Und mir Drottle friere duss an Ranze
D Queens-Royal Guarde bewacht das Ganze
|