Sujet 2015: SELFIE

Halbmondclique Frenkendorf

SELFIE

  Bevor mir pfyffe und au drummle

Und am Sunntig nochär dien bummle

Bevor der Chiembäse verbrennt

Nochhär an Morgestraich goht, wär nit verpennt

Bevor Di Larve dunde isch

Und Du zum gässle gwabnet bisch

Druck ufs Chnöpfli und due lache

Vergiss nit schnäll e Selfie zmache

Den jags dur Facebook oder Twitter

Use ins Netz und hinter Gitter

Mit Blitz und Bytes dur e Eter duure

Die ganzi Wält gseht jetzt Di Schnuure.

Und e Mänge kommentiert: „Guet Nacht,

Hätsch besser d Larve vorhär abegmacht!“

Jede het sich hüt unscheniert

Scho x-mol sälber fotografiert

Und het er s knipst, lost er si Schnuure

Für alli Spanner durch s Netzt den duure

Sinn doch alles zämmer Twitter

In däm grosse Laufwärkgitter.

Denn scho churz nach der Geburt

Nimmt s Buschi em Mami s Handy fuhrt

Und lot bevor s fot afo schreie

S erschti Selfie vo sich lo gheie

Au dr Petrus seit am Himmelsdoor

Vergiss nit mach vo Dir

bevor De gosch no gschwind

E Selfie vo dim wieschte Grind

Den post di Giftfläscheprotrait

Das Di die ganzi Wält cha gseh!

Und vor de Bildschirm dien den d Affe

Kommentiere, like, Di begaffe!

Ob Du, ob ich oder die näbedra

Vo allne chasch e Foti ha!

Ellei zu zweit und au in Gruppe

Oder im Putin sini Truppe

Öb Chrieg oder OSZE

Überall chasch Selfies gsee

Wieso isch der Snowden ins Exil flaniert?

Er het sich mit Gheimdienscht fotografiert!

Und worum häti der Obama statt spioniert

Lieber telefoniert als fotografiert?

Worum macht sie kei Selfie d Angela Merkel?

Will si druff usgseht wie e Ferkel!

E Mänge bringt sone Bild vor Gricht

Im Netzt si d Schotte nit immer dicht!

Was macht der Kapitän bevor s Schiff untergoot

E Selfie schnäll in grosser Not

Het sich mit der Stewardess ins Bild ygfange

Denn isch Concordia untergange!

Das Selfie het en ins Gfängnis brocht zum Schluss

Derfür het d Stewardess druff d Schöppe duss!

Au e Sekretärin zieht ihri Lümpe us

Und knipst sich blut im Bundeshuus

Doch wär isch klar der gröschti Knüller?

Der bluti Arsch vom Geri Müller

Doch lieber si Fudi, kommentier ich drunter gschwind

Dasch besser als si dumme Grind!

Scho wieder schwanger, wie cha das si?

D Prinzessin Kate – si wirft scho gli

Sicher het e Windsor – s wär jo glacht

In dere Nacht e Selfie gmacht.

Au der Clooney isch jetzt nümme ledig

Schiesst e Selfie in Venedig.

Un in der ganze Schwiz gsehsch jetzt bald

Fotofallene im Wald

Die zeige Viecher dört bym schaare

Oder Bsoffeni bym paare.

Un der Hammer gescht uf RTL jetzt ständig

E füdleblutti Verkuppligs-Sändig

Zerscht chunnts Vögeli denn der Blitz

Mit nacktem Ranze oder Schlips

Vor Iphone oder Samsung posiert

Facebook postets unscheniert

Sigs e Penner, Bulle, edle Ritter

Sinn alles zämme die glyche Twitter.

Öb by de Oscars oder Politik

Selfis si bi allne schik

Im Wisse Huss oder däm Huus z Bärn

Mir hei alli Selfis gärn

Ob Sportler oder Terrorischt

Alli poste ihre Mischt!

Drumm bevor der Zug cha starte

Muess der Tambourmajor warte

Bevor d Larve duesch abmache

Duet jede schnäll ins Smartphone lache

Stört keine das Zyt duet verstriche

Die Duble möche alli s glyche

Und wenn d Larve alli dunde hei

Stoht der Tambourmajor am Rand ellei

Kei –Arabi vorwärts Marsch- Er knipst no schnäll si blute Arsch!