Sujet 2018: Bisch alt und hesch no Gäld,- denn gsehsch vom Turm diä ganzi Wält

Halbmondclique Frenkendorf

Bisch alt und hesch no Gäld,

denn gsehsch vom Turm diä ganzi Wält

Jetzt sitze mir zwei alte Tante

do uf däm Turm em allbekannte

jede gseht is dunde sigs Chatz, Muus, Wurm

mir geifere usem Schöntalturm!

Denn an der Schöntaler Skyline chasch, oje

dä Schöntalturm vo wytem gse

so stoht är dört dä wieschti Pfoschte

vo Nord, Wescht, Süd und Oschte

nit z´überseh us alne Warte

er gseht us wiene Leidzirkularcharte

s isch wäg dä scharze Fänschterrähme

us dene mir eus uselähne.

zwüsche Fränkedorf und däm Kaff näbedra

chasch dört jetzt z´Morge z´Mittag z´Obe ha

äs sig vermerkt an dere Stell

s cha dinn nit ässe cho wär well

wenn de jung bisch ischs e ganz klars: -nein-

Jo, dä Turm isch drum es Altersheim

sozial gsee lot das d Verwaltig chalt

denn wär im Turm hockt, zahlt und zahlt…

e Wohnig dinn isch drum sehr düür

und no mehr düür mit Mehrwärtstüür:

Bisch alt und hesch no Gäld,

denn gsehsch vom Turm diä ganzi Wält

bisch aber alt und hesch kei Chole

no cha di der Teufel hole

doch mit Zaschter, das isch klar

gits Champagner und Kaviar

nur s Bescht für d Gescht

d Creme de la Creme

nischte mir is z´Oberscht yy bequem

und löhn vo do, es isch zum schreije

blödi Möcke uf die dört unde gheie

wo sich dä Turm nit chönne leischte

und in der zweite Klass vergeischte

mit chaltem Wasser und hartem Brot

was villicht agnähmer isch in ihrer Not

denn wenn s dunksch und das isch jetzt kei Seich

wird’s hart Brot im Wasser wieder weich.

besser für d Zehn vo dene arme Alte

wo s Ässe sowiso nit chönne bhalte!

Jä sisch eso:

Gäld regiert d Wält, drum simmer do

Bisch alt und hesch no Gäld,

denn gsehsch vom Turm diä ganzi Wält

jä Hochhüser si hüt modärn

jede will eis, het se gärn

immer grösser, besser, si hei nie gnue

d Rosche baut jetzt no eis derzue

i glaub die stönde uf em Kabel,

weisch nümm was damals gange isch in Babel?

sie baue überall in jeder Stadt

Turm um Turm s isch halt sauglatt

bis alles voll isch vo modärne Türm

wie z New York in däm Hochhusgschtürm

dört merksch vor luter Wolkechratzer nit

wievill s vo dene Chratzer git

chasch nit unterscheide wele isch wele

und merksch chum wenn emol zwei fehle.

Bisch alt und hesch no Gäld,

denn gsehsch vom Turm diä ganzi Wält

villicht choscht das ganze so vill

will me d Architektur saniere will?

villicht isch dä Turm nit us Stei

sondern us türem Elfebei

wie dä us der unändliche Gschicht

-man weiss es nicht - man weiss es nicht-

und zum d Choschte wieder ynezhole

chönnt me s Eröffnisgsfescht jo wiederhole

das isch jo eh ins Wasser gheit

s het grägnet, chutet jo schins fascht gschneit

und mit eme Rollatoretanz

versufft die Party dene ganz.

ich erinnere mi no ganz im Klare

wo mer dr Heiri isch über Zeche gfahre

i ha nit gschumpfe, s macht kei Sinn

jo i gpür mini Zeche sowiso nümm

und der Heiri aschreije bringt jo au nüt

wenn si Hörgrät ufem Zimmer lyt

aber Spass bisyte, loset zue me chönt probiere

zum d Chöschte wieder z refinanziere:

wär das nit e tolli Chischte

wenn me für d Tourischte

e Sässellift baut ufe Turm

wo lauft by Tag und Nacht und Sturm

zünftig Ydritt verlangt für ufe Gipfel ufe

und wenn sie obe abe wei nach em Verschnufe

nomol bevor Si si gange

ungfehr zwanzig Stutz verlange

die wo nit chönne zahle denne

mien halt d Stäge aberenne

und s Trinkgäld got denn nit an Turmkasse

das diem mir zwei an der Bar verprasse.

e Schissvorschlag meit do d Verwaltig

jä no dasch dere ihri haltig

no ischs eso es blybt derby

wär ufe Turm will, mues rych sy!

Bisch alt und hesch no Gäld,

denn gsehsch vom Turm diä ganzi Wält!