Halbmondclique Frenkendorf

Mit em Virus infiziert

Was isch das nur für e komischi Zit,

mir sind eus einig do git's kei Strit.

S isch doch würkli nid zum lache,

scho wider dörfed mir kei Fasnacht mache.

I kein Umzug dörf me inestoh,

ufgrund vomene Beschluss, wo de Bundesrot hät erloh.

Stattdesse hei mir so neui Sache müese lärne wie Souschäl Distänsing, soziali Dischtanzierig,

offiziell aag'ordnet vo de Helvetische Regierig.

Houm Offiss, Houm Sguuling, Schattdaun und Lockdaun, das isch nid öppe Tiini-Dialäkt,

nei, das chunnt us em Bundeshuus, vo eusne Corona-Spezialischte diräkt.

Bi jedere Glägeheit mues me sini Töpe wäsche,

und anstatt Pfäffersprey häsch jetzt Desinfektionsmittel i de Täsche.

Uf s obligate Begrüessigsküssli muesch verzichte,

Sex git's nur no mit zwei Meter Abstand, und no anderi Gschichte.

In s Joggeli dörfe mir au nümme zu eusem FCB,

wobii, villicht isch es besser, so müemer all die Truurspiel nid gseh.

Alles wird verschobe oder abgseit, Fasnacht, Banntag, Mäss und d 1. Auguscht-Fiir,

defür hät de Oli Oesch für eus gsunge, im Färnseh, und jede Obe im Quartier.

D Autobahne und d S-Bahne sind fascht läär, doch s dehei bliibe fallt eus schwär.

I de Läde sind Gmüesgstell läär kauft worde wie zu längscht vergangne Zitte,

und d Lüt hei sich sogar um s WC Papier g'stritte.

Covid-19 heisst dä neui Riisser,

e Lungechranket, und vo däm bechunnsch sogar de Schiisser.

E Vereinssitzig oder es Träffe mit Fründe muesch im Kompiuter mache,

mängi sind schlichtwäg überforderet gsi mit söttige Sache.

Das heisst jetzt ganz modärn en Skaip-Videotschätt organisiere,

aber dodezue häsch zerscht müese di richtig Softwäär inschtalliere.

Luschtigi Bilder hät me do chönne gseh, Lüüt im Pischama,

i de Schale, mit Tiischört und no viles meh.

Wämmir an d Zuekunft dänked wird's eus Angscht und Bang,

verfolgt eus das Viruszügs ächt no lang?

Nomol es Johr ohni Fasnacht, wie söll dänn das nur goh?

Mir wüssed nid, wie mir das sölled überstoh,

und finded, es tuet jetzt öppe länge,

und trotzdäm leumer eusi Chöpf nid hänge.

So hoffed mir uf di nationali Impfstrategie,

und dass dä Albtraum isch bald emol verbi.

Dänn was au immer no passiert,

mir sind und bliibed mit em Fasnachts-Virus infiziert.