|
Halbmondclique Frenkendorf
Mir leggä eus warm a… ******************************** Es duet mi fröschtle wenn ich d Ziitig ufmach,
uf dere Wält gits nur no Lärm und Krach.
Es tschuderet mi wenn ich dr Fernseh ischallt,
mängs Problem wird nume no glöst mit Gwalt.
Us em Radio hallt e chalti Briise,
d Nochrichte sind gspickt mit Krise.
Trotz dr Ärderwärmig friieri bi dene Gedankä,
do chunnt mis Härz ganz schön ins Schwankä.
Ich fühl mich leer, weiss nümmä wiiter,
stohts mit dr Wält den würklich so schiiter?
Ich legg mich ah, ich pack mich ii,
ich red mir ii: S goht gli verbii!
D Greta het öis scho lang gseit,
in Sache Klima hei mir verseit.
Während bi eus d Gletscher schmelze, ischs bi andere bitterchalt,
Flüss überschwemme d Dörfer und glich heimers nonig gschnallt.
Das Thema isch gross und überall in de Ohre,
es goht aber nit lang und ä neui Krise isch gebore.
In China isch e Virus namens Corona am umeschwirre,
mir hei glacht und denkt „Dä cha sich sicher nit bis zu öis verirre!“
Dä Virus jedoch het öis eines Besseren belehrt,
und sich au do in dr Schwiiz ganz rassant vermehrt.
Die Pandemie macht chrank und nit nur uf ei Art,
Öisne Junge gohts schlechter und das isch nur dr Start.
D Weltwirtschaft stoht still, das isch fatal,
luut und hecktisch isch es nur no im Spital.
Alli hei z kämpfe mit dr soziale Distanz,
was uf dr Strecki blibt isch d Toleranz.
Sie säge „siget solidarisch und gäbet uf öichi Mitmensche acht“,
glich sind mir egoistisch und die negative Gedanke bechöme meh Macht.
Ich legg mich ah, ich pack mich ii,
ich red mir ii: S goht gli verbii!
Ei Krise löst die ander ab, drum isch es denn au so,
wo dr Ukraine-Krieg usbricht isch Corona nümme do.
Ganz Europa färbt sich Blau-Gäl, egal wod anefahrsch,
ä Wuche spöter heissts bi öis denn glich: „Fasnacht vorwärts Marsch!“
Im Putin sini Truppe zerstöre ganzi Existänze,
während dem bi öis d Guggemusig durch d Gasse schränze.
D Fasnächtler diskutiere wie sie zu dr nögschte Beiz glange,
mache sich chuum Gedanke, dass anderi um ihr Lebe bange.
Europa duet die mächtige Oligarche sanktioniere,
doch mir chöi durch das nüm vom russische Gas profitiere.
Ich legg mich ah, ich pack mich ii,
ich red mir ii: S goht gli verbii!
Nit nur s fehlende Gas und die hoche Priise,
au dr mangelndi Strom zieht öis in die nögschti Krise.
Drum wäi mir eus meh uf öis konzentriere,
und zuekünftig grüeni Energie im Inland produziere.
Es wär so eifach: Stellsch e Windrad uf d Alp,
doch do chunnt scho dr erscht wo die Idee gar nit gfallt.
Vo allne Siite ghörsch mir müend CO-2 neutral sii,
doch d Ziit vo de AKWs isch nonig ganz verbii.
Ich chas nüm ghöre, chas nüm gseh,
gits uf dr Welt nur no Krisene und nüt anders meh?
Ich mach d Auge zue, ich stell mir vor,
dass es einisch guet chunnt in vielne Joor.
Ich han d Hoffning das mir einisch wieder alli Lache,
bi dem Gedanke möchti d Auge gar nüm uf mache.
Es isch schön z wüsse dass au in dä dunkelschte Stunde
d Hoffnig in öis in nit ganz isch verschwunde.
Es nützt nüt d Auge bi all dene Problem zue z loh,
mir müesse halt jetzt dr Realität gegenüber stoh.
Ich lueg usem Fenschter use und gseh dört hinde,
wie es Blüemli dr Wäg dure grau Asphalt duet finde.
Ich legg mich ah, ich pack mich ii,
ich hoff ganz fest: S goht gli verbii!
|