Halbmondclique Frenkendorf
Lueget nid umme, dr Chäfer goht umme.
********************************
Hesch gseh, wie si ummespringe, die Männer und Fraue,
wiesi jedes Pflänzli cheere und Falle ufbaue?
Käi Stäi leu si ufm andere,
merke nid, dass mir immer wyter wandere.
Dä dört hinde, het sis Gärtli scho 4 Wuche nümm gsprützt,
aber mir frässe wyter - das het nüt gnützt.
Gsehsch dä Platz dört äne,
Dört si doch d Lüt im Summer am fäne.
Jetzt häisen wäge eus müesse speerä,
aber mir frässe wyter – die cheu sich lang wehre.
Dank eus het dr FCB nid chönne trainiere,
si häi rächt müesse ufbasse, dass si sich nid blamiere.
Mir dänke drby jo nid nur an eus,
Glychberächtigung – für EUS nüt neus.
Für EINISCH häi d Fraue vom FCB,
äs anders Spielfäld dörfe gseh.
EIMOL im Joggeli ymarschiere,
und im Stadion brilliere.
Und alles nur, will eusi Fründe,
S Liechtathletik Stadion sy go ergründe.
Dr zueständig Platzwart het luter Falle ufgstellt,
Die hätter lieber nid bi TEMU bschtellt.
Vill zspoot si si cho – dr Online Shop het versäit,
Do häi mir scho längschtens eusi Eier gläit.
Hätte die Falle überhaupt funktioniert?
Oder hätte d Chinese eus drmit uspioniert?
Eis isch klar – um eus sicher zvrnichte,
Hätte si uf d`Falle chönne vrzichte.
Si hätte lieber Chinderspielzüg bschtellt,
d`Giftstoff dört drin hätte eus ALLI gschwellt.
Was do alles bschtellt wird – sy DIÄ naiv!
Päcklifluet us China – DASCH Invasiv!
Häi die sich scho überläit, worum TEMU immer weiss,
was gnau dass si sueche – vo däm billige Scheiss?
Und wüsse si immernoni, was si wäi importiere,
chönne si sich uf Tik Tok loh inspiriere.
Scho gli drufabe, stönde si wie die Dumme,
5 Stund für ä Dubai Schoggi umme.
Und rennä denn, äs isch zum lache,
an Brienzersee go Selfies mache.
Und wenn si das denn häi dörfe erläbe,
gsehsch sä scho widr am Iphone chläbe.
Immer uf dr Jagd – Angscht öbbis zvrpasse,
möglichscht s`Neuschte ha, vor dr breite Masse.
Wenn die dr ganz Tag am Handy vrsuume,
merke si gar nid, wie mir ihne dr Garte leerruume.
Si verliere sich bim swipe - si DIE naiv!
Im Sog vo Social Media - DASCH invasiv.
Dä Wahnsinn isch nüt für eus zwäi,
lieber si mir dusse, statt äläi dähäi.
Lueg dört unde - die ville Lüt,
Bi Wind und Wätter go Proobe – die kennä nüt.
Düei mitenander Musig mache,
für d Fasnacht üebe – zämme lache.
Fründschafte im Do und Jetztä gniesse,
statt alles z`poste und Selfies z`schiesse.
Scho sit Wuchene si si dra,
chläischtere und moole Larve a.
Nähie an ihrne Koschtüm umme,
putze d`Piccolo – schränke d`Drummle.
Zämme bim Värslibrünzle d`Zyt vrtrybe,
bis d`Chöpf räuchne Zeedel schrybe.
Requisite baschtle – Koschtüm sortiere,
Churz vor Schluss s`Latärnli montiere,
drmit wenns Glöggli Vieri schloht,
ä jede in dä Gasse stoht.
Vom Virus packt und infiziert,
D Frau Fasnacht jetzt die Lüt regiert.
Wenn dä Chäfer d Rundi macht,
si d`Lüt seelig – Tag und Nacht.
Leu sich eifach so lo trybe,
wäi im Fasnachtshimmel blybe.
Mir Japanchäfer gseies y,
do wäre mir au gärn drby.
Sit Generatione läbe si die Tradition,
jedes Johr ufs neue – die perfekti Invasion!